Desarticulan en Soria un grupo criminal que estafou un veciño de Caldas polo "timo do cambio"
Por Natalia Puga
A Garda Civil logrou desarticular na provincia de Soria unha organización criminal dedicada á comisión de delitos de estafa mediante o coñecido como 'timo do cambio' e, entre as vítimas, figuran dúas persoas en Galicia, nas provincias da Coruña e Pontevedra. Segundo puido confirmar PontevedraViva, trátase dunha estafa realizada en Caldas de Reis.
Os estafadores actuaron en polo menos seis provincias españolas, aínda que son naturais de Madrid. En concreto, foron detidas como sospeitosas de pertencer á organización tres persoas ás que se lle atribúen oito delitos de estafa e pertenza a organización criminal. Cometeron timos en Soria (2), A Rioxa (2), Valladolid (1), Alacante (1), A Coruña (1) e Pontevedra (1) por valor duns 3.000 euros.
A investigación policial, bautizada como 'operación BET', realizárona axentes da Garda Civil da Comandancia de Soria por mor dunha estafa denunciada o 12 de setembro de 2020 no centro comercial Camaretas, de Golmayo.
Os investigadores puideron determinar o vehículo utilizado polos presuntos autores e, utilizando as bases de datos policiais, lograron que o denunciante recoñecese as fotografías de dous dos presuntos autores da estafa.
Por mor dese recoñecemento fotográfico, relacionaron aos autores recoñecidos no feito delituoso labor en Soria cun delito cometido o día anterior, baixo o mesmo modus operandi no centro comercial Berceo, na localidade de Logroño, e un delito máis cometido o mesmo día nun supermercado da localidade de Santo Domingo da Calzada (A Rioxa).
Finalmente, a Garda Civil logrou relacionar aos integrantes da organización criminal investigada coa comisión de varios delitos no resto das provincias citadas e concluíron que podían levar a cabo varias veces a mesma estafa ao longo dun só día.
A investigación continúa aberta.