Nunha clasificación de adestradores caninos coñecidos e recoñecidos en España, Santi Vidal e Eli Hinojosa estarían entre os primerísimos postos. É o nivel que trae esta vez o programa de PontevedraViva Radio dedicado á educación dos cans e que ofrece quincenalmente outro educador canino, o pontevedrés Diego Álvarez.
Levan tres décadas ocupados na educación canina en positivo, ademais deste traballo de adestramento, imparten seminarios e cursos por toda a xeografía española. De feito proximamente estarán en Galicia, a pedimento da Asociación 3PA para falar de agresividade, un seminario que "cambiou a vida de moitas persoas e de moitos cans", apuntan.
"Adestrar en positivo é un modelo de convivencia entre cans e humanos para mellor vida de ambos", desta maneira Jaime 'Santi' Vidal define en Podcans á metodologia que eles aplican. Indican tamén circunstancias como que "o principal problema dos cans hoxe en día é a tensión e o medo" resultado das alteracións emocionais dos seus guías.
A outra imaxe que acompaña a este podcast é a de 'Klaus', un American Bully Pocket de entre 4 e 6 anos que está a ser coidado pola Asociación 3PA de Santiago de Compostela e que require adopción.
Está esterilizado, non convive con gatos e no caso de cans, mellor con femias que con machos. Os seus guías terían que ter precaución coas exposicións ao sol de 'Klaus'. Quen estea interesados poden chamar ao 611 181 567.