O saneamento do río Lameira inclúe a construción dunha pista de skate e BMX
Por Redacción
O Concello de Marín ten prevista unha intervención de gran calado na contorna do río Lameira, no que se atopan instalacións tan importantes como o centro de saúde, o CEP Sequelo, o pavillón ou as hortas urbanas.
En materia de saneamento, está prevista a mellora integral do colector que transcorre ao longo do curso do río. Pero na superficie tamén haberá actuacións notables.
A concelleira de Medio Ambiente, Marián Sanmartín, fixo público este xoves, despois da comisión de medio ambiente celebrada no Concello, que se creará unha área de lecer infantil e xuvenil na zona verde que existe entre o centro de saúde e o pavillón do Sequelo.
Ese parque contará tamén cun espazo específico para o mundo do skate e a BMX coa creación da primeira pista pump- track da vila.
"Queremos seguir apostando polo lecer deportivo da mocidade, moi centrado na cultura urbana que en Marín ten moitos seguidores e que supón unha actividade saudable nunha contorna tan verde e viva como é a do Lameira", asegurou a edila.
Ademais, no parque crearase unha zona axardinada que servirá como peche da instalación con mobiliario urbano, bancos e unha pérgola de madeira para crear sombra. Unha fonte, con auga canalizada desde o río, percorrerá todo o espazo e contará con chafarices de chorro vertical ornamental ao longo da canle.
Outra das cuestións relacionadas co aproveitamento da contorna do río Lameira e que xa figuran no proxecto desde a súa redacción é a continuación da senda para unir Ponte Zapal co lavadoiro de Coirados e, á súa vez, enlazar co itinerario peonil de Coirados a Pardavila recentemente inaugurado.
Relacionadas:
-
Vilanova terá o primeiro pump-track do Salnés
Por Redacción |
-
A Consellería contesta á Plataforma de Lourizán sobre o proxecto de "Saneamento do Río Lameira"
Por Oskar Viéitez |
-
As obras de saneamento no ámbito do río Lameira durarán un ano
Por Redacción |
-
Axilízanse os trámites para acometer as obras de mellora da rede de saneamento na contorna do río Lameira
Por Redacción |
-
O PSOE de Marín rexeita o skatepark do Lameira e pide deixar de construír na ribeira do río
Por Redacción |
-
O PSOE de Marín reclama que se aproveite a obra no colector do río Lameira para ampliar a senda fluvial
Por Redacción |
-
A mellora do colector do Río Lameira ascende a case 4 millóns de euros
Por Redacción |