Pontevedra e Ponte Caldelas, en alerta ante a posibilidade de desbordamentos nos ríos Lérez e Verdugo
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
As intensas choivas caídas nas últimas xornadas elevaron sensiblemente o caudal dos ríos, tanto que as autoridades e os servizos de emerxencia puxéronse en alerta en municipios como Pontevedra e Ponte Caldelas.
Segundo informa o Centro de Atención ás Emerxencias 112 Galicia citando datos proporcionados por Augas de Galicia, este martes superáronse os limiares establecidos nos ríos Verdugo e Lérez, o que pode provocar desbordamentos nalgúns puntos sensibles.
O curso de ambos os dous ríos está a presentar niveis altos de caudal, e isto fai aumentar as posibilidades de que se produzan avenidas, explica o 112.
Con este motivo, a Xunta de Galicia mantén activo o Plan Especial para o Risco de Inundacións (INUNGAL) para informar sobre o estado e evolución dos ríos ante a actual situación meteorolóxica adversa.
O servizo de emerxencia recoñeceu ademais recibir nas últimas horas chamadas de alerta relacionadas con desbordamentos doutros cursos fluviais, entre eles o río da Gándara, en Pontevedra.