O gasto social no Concello de Cerdedo Cotobade é de 95 euros por habitante
Por Redacción
O peche da Conta Xeral do 2019 do Concello de Cerdedo Cotobade confirma que o goberno do alcalde Jorge Cubela incrementou en máis dun 70% o gasto adicado a Servizos Sociais do municipio acadando un investimento duns 556.000 euros, o que supón unha media de 95 euros por habitante.
O goberno local asegura estar xa moi preto do listón dos cen que está catalogado como "excelencia social" pola asociación estatal de directores e xerentes desta labor.
A maior parte da partida de Servizos Sociais foi destinada a incrementar o número de beneficiarios dos programas englobados no Servizo de Axuda no Fogar (SAF) e Xantar na Casa que permite atender nos seus domicilios a un maior número de persoas que o precisan a través de dar novas altas destes servizos de atención pesonalizados.
Ademais aumentouse nunha porcentaxe similar o gasto en Emerxencia Social para atender a demanda que se presentou en materia de acceso a alimentos de primeira necesidade, pagamento de alugueiros de persoas en risco de exclusión social e mesmo recibos de luz para combatir a pobreza enerxética e evitar que se producira calquera corte no subministro nalgún fogar do municipio.
Jorge Cubela afirmou que "temos un compromiso irrenunciable de atender cos recusos dos que dispoñemos as necesidades dos nosos veciños e veciñas que estean en risco de exclusión social ou que sexan socialmente vulnerables".
Segundo o alcalde, "desde a fusión pasamos de destinar unha media de 55 euros a Servizos Sociais ata os 95 euros que temos agora".
Cubela volveu a anovar o seu compromiso "a prol dos máis desfavorecidos articulando medidas que nos permitan seguir mantendo a nosa solvencia económica sen descoidar en ningún momento o noso deber que nos impón a nosa conciencia de axudar a quen o precise", concluíu.