Catro encapuchados asaltan un camión en Vilaboa e levan un bote de 530.000 euros en tabaco
Por Natalia Puga
Catro persoas encapuchadas asaltaron este martes pola mañá un camión en Vilaboa e acabaron levándose un botín de 530.000 euros en caixas de tabaco. A Garda Civil estableceu un dispositivo de busca, pero os asaltantes non foron detidos.
O asalto produciuse sobre as 9.30 horas deste martes no punto quilométrico 130,400 da estrada nacional N-550, á altura da parroquia de Bértola de Vilaboa. Segundo relatou o camioneiro, catro homes encapuchados chegaron en dous coches, cortáronlle o paso e obrigaron a deter o vehículo.
Os catro asaltantes ían encapuchados, pero non armados. Si utilizaron a coacción para obrigar o condutor a baixar do camión e fuxiron a bordo deste. Nese momento, coa colaboración veciñal, o camioneiro deu alerta do sucedido e a Garda Civil estableceu un dispositivo de busca.
O operativo deu resultado pouco despois coa localización do camión no cruzamento do Viso, no Concello de Redondela. Estaba abandonado e non había rastro dos seus asaltantes, que tiñan levado toda a carga.
Segundo indicaron fontes da investigación, os asaltantes leváronse 265 caixas de tabaco que estarían valoradas en 530.000 euros.
Un dos vehículos utilizados no asalto fora substraído previamente en Vigo.