Falece Juan Francisco Froján, ex delegado de Medio Ambiente en Pontevedra
Por Redacción
Loito na familia socialista de Caldas de Reis. Juan Francisco Froján, ex delegado provincial de Medio Ambiente en Pontevedra co goberno bipartito, entre os anos 2005 e 2009, faleceu este sábado aos 56 anos de idade.
Froján, que levaba anos apartado da primeira liña política, foi tamén secretario xeral do PSdeG-PSOE en Caldas de Reis, e unha persoa moi querida no municipio. Ademais, ostentou a secretaría xeral das Xuventudes Socialistas de Galicia entre 1986 e 1991.
Licenciado en Xeografía e Historia pola Universidade de Santiago, actualmente desenvolvía a súa actividade profesional como integrante do grupo de investigación Esculca, un grupo de referencia competitiva do sistema universitario de Galicia .
Casado e con dous fillos, o corpo de Juan Francisco Froján, que está a ser velado no tanatorio de Caldas, será incinerado este domingo no crematorio de Ponte Caldelas, na intimidade familiar.
Os funerais pola súa memoria celebraranse en próximas datas.
A través das redes sociais, varios compañeiros de partido expresaron as súas condolencias por este falecemento.
Tristura polo falecemento do compañeiro e socialista de corazón, Juan F. Froján, militante da agrupación de Caldas, quen fora delegado da Consellería de Medio Ambiente en Pontevedra.
— Gonzalo Caballero (@G_Caballero_M) June 6, 2020
Sentido pésame á familia. pic.twitter.com/jxJPu8XHLf