Traballadores e CC.OO. saen á rúa para dicir "non á represión sindical en Moldes"
Por Redacción
A Dirección de Supermercados Moldes segue "a dinámica de usar o poder empresarial para reprimir a protesta sindical" e "non respectan que se cumpra ou convenio e os dereitos colectivos" dos traballadores, pero, sobre todo, dos delegados sindicais.
Así o sostivo este mércores o secretario comarcal de Comisións Obreiras, José Luis García Pedrosa durante unha concentración de protesta convocada ás portas do supermercado Moldes da rúa Fernández Villaverde.
Tras unha pancarta que reza un "non á represión sindical nos supermercados Moldes", unha trintena de traballadores denunciou accións de represión contra os representantes de CC.OO. no comité de empresa. A última foi unha sanción de dez días de suspensión de emprego e soldo a un sindicalista que, segundo Pedrosa, "solicitou dous dos seus catro días de permiso, non lle responderon e sancionárono".
ÿ, para o representante de CC.OO, "unha máis das accións represivas" que se repiten dende que este sindicato entrou a formar parte do comité de empresa. Ten catro dos 13 representantes do comité, xa que o resto son de UGT (3) e Fetico (6), e aseguran que as outras dúas centrais teñen unha política de "inacción sindical".
A protesta deste mércores é só "unha chamada de atención" á empresa para reclamar que cese a "represión sindical sistemática", que se fai "exclusivamente contra os membros do comité de empresa de CC.OO. e os afiliados deste sindicato".
"Non imos permitir que se manteña", asegura García Pedrosa, e anuncia que "se se respectan os dereitos laborais e sindicais, volveremos á normalidade". En caso de que "continúen neste líña", organizarán novas accións de protesta.