A crise provoca que máis de 200 persoas se acheguen a diario ao comedor de San Francisco
Por Mónica Patxot & Anxo Lourido
O 13 de xuño o comedor social de San Francisco cumprirá 33 anos de existencia. Este espazo realiza un labor fundamental entre a poboación máis desprotexida. Un labor que se incrementa durante estes tempos de incerteza económica e sanitaria.
Este mércores, un mes antes do aniversario deste local de solidariedade social, o alcalde de Pontevedra, Miguel Anxo Fernández Lores, e a concelleira de Benestar Social, Paloma Castro, visitaban as instalacións nas que se atopaba o coñecido chef Pepe Solla e o responsable do comedor, o pai Gonzalo Diéguez.
A expansión do coronavirus cambiou nestes meses o funcionamento do comedor. Pasou de ser presencial a establecer un servizo que permite aos usuarios levar a comida ao domicilio. O pai Gonzalo Diéguez sinalaba que, polo momento, non se rexistraron positivos entre o persoal do comedor.
O chef Pepe Solla encárgase, tres días á semana, de preparar os pratos para os usuarios. Un labor de colaboración do "estrela Michelín" que o alcalde agradecía sinalando que "somos referencia ata niso. Somos dos poucos comedores sociais que contan cunha estrela Michelín", comentaba Fernández Lores durante a visita sinalando que o Concello está a achegar o imprescindible para que este espazo poida continuar desenvolvendo a súa importante actividade.
O pai Gonzalo indicaba que con frecuencia teñen que substituír pratos, tarteiras grandes, vasos ou calquera outro elemento necesario para o funcionamento do comedor e que o Concello encárgase de achegar este material. A concelleira Paloma Castro agradecía ás empresas privadas a doazón de alimentos.
Se ata antes do estado de alarma, os usuarios que acudían ao comedor roldaba as 130 persoas, agora a cifra chega a 200 cidadáns que acoden ata o comedor para que lles proporcionen comida para eles e as súas familias. Os efectivos de Protección Civil encárganse de que se cumpran os protocolos de seguridade e hixiene por parte dos usuarios.
A repartición realízase entre as 12.30 e as 13.30 horas con bolsas que conteñen froita, leite e alimentos cociñados ou que tamén se poden cociñar nas vivendas particulares, ademais dun bocadillo para a noite.
O alcalde sinalaba que desde o goberno local esperan que non se incremente nos vindeiros meses o número de usuarios e no caso de que a cifra aumente, a administración local realizará un esforzo para atender á xente máis necesitada.
Relacionadas:
-
Cambio no comedor social de San Francisco: o pai Gonzalo pasa a remuda tras 15 anos á fronte
Por Natalia Puga & Mónica Patxot |
-
Pepe Solla e Manel Loureiro analizarán as consecuencias da pandemia nos Directos de Afundación
Por Redacción |
-
Pepe Solla pon fin a unha tempada "gratificante e moi triste á vez" no Comedor de San Francisco
Por Manu Otero & Mónica Patxot |
-
Benestar Social leva investidos máis de 177.000 euros na atención aos máis vulnerables durante o estado de alarma
Por Redacción |
-
Úrsula Varela, camareira á espera de cobrar o ERTE, con dous fillos pequenos e sen axudas: "Vivimos con angustia"
Por Anxo Lourido | Creada e actualizada
-
O comedor de San Francisco recibe produtos do agro a través da rede de Mercaproximidade
Por Oskar Viéitez & Mónica Patxot |
-
Preocupación entre as entidades sociais de Pontevedra polo aumento da demanda de alimentos
Por Oskar Viéitez |
-
O comedor de San Francisco amplía os días de servizo ante o aumento de usuarios
Por Almu Dapena | Creada e actualizada
-
Cociña 'con estrela' para alimentar o comedor social de Pontevedra
Por Alejandro Espiño & Diego Torrado |
-
San Francisco, o comedor máis solidario... mesmo en tempos do coronavirus
Por Alejandro Espiño & Diego Torrado |