Caldas recupera a escultura de Laureano Salgado polo 90 aniversario da sea morte
Por Redacción
O vindeiro martes 5 de maio fará 90 anos da morte do empresario e promotor industrial Laureano Salgado no ano 1930 e, un día despois, conmemórase o aniversario do seu nacemento o 6 de maio de 1847. Con motivo de tan sinaladas datas, o Concello de Caldas quere lembrar a figura de quen foi promotor da electrificación de Galicia e anuncia que vai proceder ao acondicionamento da escultura sobre a súa figura instalada no municipio hai máis de medio século.
Laureano Salgado é unha figura recoñecida en Caldas de Reis, pois foi nomeado Fillo Predilecto do municipio en 1928, deulle o seu nome a unha rúa céntrica do municipio onde se atopa a casa na que habitaba e dedicóuselle un monumento na entrada do Xardín Botánico, que se inaugurou en 1953, por iniciativa da Asociación de Peritos Industriais de Galicia. Trátase dun busto en bronce que recorda a súa figura, obra do artista Ramón Martínez Lamadrid, que agora vai ser recuperado.
Ademais, o Concello vai divulgar a súa figura e a súa obra en redes sociais e anuncia que, a medio prazo, vai proxectar a súa figura en toda Galicia, tendo en conta que as súas iniciativas empresariais e de enxeñería desenvolvéronse por moitos municipios.
Sobre a importancia da súa figura, o historiador Raúl Soutelo Vázquez, profesor na Universidade de Santiago de Compostela, sinalou que "foi un dos máis destacados impulsores da electrificación de Galicia e un dous empresarios máis importantes que esta tivo durante os anos finais do século XIX e ou primeiro terzo do XX".
Entre os seus proxectos fóra de Caldas destacan o balneario marítimo A Concha de Arosa, en Vilagarcía de Arousa, a constitución da Sociedade Anónima La Toja e a construción do Gran Hotel e da Fábrica de Xabóns, así como a Fábrica Azucreira de Portas. Impulsou tamén a construción de infraestruturas portuarias como o peirao do Ramal no porto de Vilagarcía ou o peirao de Santa Uxía de Ribeira.
Coñecido tamén polo apelativo de 'O rei dos saltos de auga', foi fundador da que sería Sociedade Xeral Galega de Electricidade e faríase coa concesión dos saltos de Ponte Inferno, no río Verdugo, Almofrei (Cotobade) e Pego Negro (Gondomar), e do río da Patela que daría lugar á Eléctrica Cuntiense.
O escritor e xurista Maximino Rodríguez Buján, coñecido como Máximo Sar, tamén destaca que foi o promotor da Virxe da Roca de Baiona e conserva nos seus arquivos unha fotografía orixinal, dedicada e asinada por Laureano Salgado, na que aparece con Alfonso Daniel Rodríguez Castelao no Festival Virxe da Roca celebrado en Caldas o 15 de xullo de 1911.
Segundo explica Máximo Sar, a Laureano Salgado gustáballe rodearse de intelectuais e artistas, ademais de políticos e empresarios da época, aos que invitaba a Caldas e á súa propia casa.