Balón de osíxeno para a Misión Biolóxica
Por Oskar Viéitez
A confirmación este venres por parte da secretaria de Estado de I+D+i do Ministerio de Economía e Competitividade, Carmen Vela, que o Goberno do Estado adiantará uns 45 millóns de euros en pagamentos ao Centro Superior de Investigación Científicas (CSIC) alivia temporalmente a situación dos traballadores da Misión Biolóxica de Galicia.
Esta institución asentada en Pontevedra dende hai máis de 80 anos atravesa unha situación límite, cun exiguo presuposto que tan só permite manter as instalacións en funcionamento ata o mes de outubro.
O CSIC é o principal organismo de investigación en España, e en Pontevedra emprega 90 persoas dependentes da Misión Biolóxica radicada de Salcedo.
O Estado achegará 44 millóns de euros "dentro dun plan de viabilidade para dar continuidade a unha institución tan relevante como é o CSIC", apuntou a secretaria de Estado.
Carmen Vela reuniuse o pasado mércores con dez directores de institutos do CSIC para abordar este financiamento extra así como a posibilidade de adiantar o pagamento ao pagamento a primeiros de setembro de ingresos de proxectos que "normalmente, se fan a final de ano".
O presidente do CSIC, Emilio Lora-Tamayo considera que o organismo necesita este ano unha achega de 100 millóns de euros, dos que o ministerio de Economía adiantou 25 millóns.
A Misión Biolóxica de Galicia necesita 300.000 euros só para este ano.