A Plataforma Galicia-EscudoCovid2019 doa 4.000 pantallas protectoras a institucións e empresas de Pontevedra
Por Redacción
A Plataforma Galicia-EscudoCovid2019, coordinada pola Universidade de Vigo e Asime e coa participación de máis de 20 empresas galegas, entregou este martes 4.000 pantallas protectoras para o coronavirus a diferentes institucións, entidades e empresas da contorna da cidade de Pontevedra.
Esta plataforma busca contribuír á loita contra a COVID-19 a través da fabricación e distribución de pantallas de protección facial para centros sanitarios, corpos e forzas de seguridade e demais actores implicados na loita contra a pandemia. No marco desta iniciativa, xa repartiron preto de 43.000 protectores nas últimas semanas.
Este martes doaron 750 protectores ao Servizo Galego de Saúde, que foron entregados a Coro Sánchez, xefa de servizo do Centro de Saúde Virxe da Peregrina. Estas pantallas serán destinadas aos tres centros de saúde de Pontevedra, aos profesionais sanitarios que realizan actividades asistenciais tanto en centros de maiores como en domicilios e a asociacións que traballan con persoas enfermas de cancro e de párkinson.
Ademais, doaron diversas cantidades a varios concellos: 900 pantallas a Marín, 600 a Pontevedra, 450 a Poio e outras 450 a Caldas de Reis.
Así mesmo, achegáronse outras 600 pantallas ao Clúster da Saúde, que serán distribuídas entre as e os logopedas galegos que prestan asistencia a nenos e nenas nos seus domicilios. Tamén se entregarn 150 pantallas á empresa do sector alimentario Pescamar.