A popular Batalla de Flores provoca caravanas á entrada de Marín
Por Oskar Viéitez & Diego Torrado
A avenida de Ourense, a praza de España, a rúas Almuiña ou Jaime Janer acolleron unha das citas máis celebradas do programa festivo de Marín: a Batalla de Flores.
Comezou ás 20.00 horas, coincidindo co retorno das praias de numerosos automobilistas o que orixinou grandes atoamentos entre aqueles que querían cruzar a vila para dirixirse aos seus destinos.
A tradicional Batalla de Flores, foi todo un éxito a xulgar polas impresións mostradas polo público que aplaudiu ás carrozas e comparsas participantes.
Tras a chuvia de confeti e caramelos houbo unha exhibición de ximnasia rítmica nas inmediacións da Alameda a cargo dos clubs Rías Baixas e Ría de Marín, e para completar a xornada: verbena nocturna, na praza de España, a cargo da orquestra Ismael.
Para hoxe está prevista a gala musical ás 22.00 horas na praza de España con Karina, Natalia, David DeMaría e Merche.