O PP propón a construción dunha senda entre A Seca e Combarro
Por Oskar Viéitez
A deputada do Partido Popular e vicepresidenta do Congreso, Ana Pastor, o deputado Diego Gago e o presidente do PP de Poio, Ángel Moldes, visitaron este venres o concello de Poio para dar a coñecer os detalles da proposición non de lei para a construción dunha senda litoral entre a zona recreativa da Seca e o casco histórico de Combarro.
A iniciativa foi presentada por Ana Pastor o 19 de xullo na Cámara Baixa, según informaron nunha rolda de prensa celebrada na praza do peirao vello, lugar no que rematará a senda proposta.
Ana Pastor destacou que entre 2016 e 2017 o goberno do PP "deseñou, financiou e executou" a primeira fase desta senda entre Campelo e A Seca, cunha lonxitude de 1,5 quilómetros e un investimento de 400.000 euros.
Neste senso, Ángel Moldes destacou que Ana Pastor "é unha garantía" xa que ela foi a "impulsora" da senda e resaltou que a construción desta segunda fase suporía unha "gran oportunidade para todos os veciños" que contarán "cun itinerario sostible, seguro e saudable que mellorará a súa calidade de vida, o medioambiente e a actividade económica".
Pastor pediu que o resto dos grupos políticos apoien esta iniciativa que permitirá a "veciños, visitantes e peregrinos" percorrer máis de 5 quilómetros a pé bordeando o mar por itinerarios "seguros e saudables" e que será "moi beneficiosa para un sector tan importante como o turístico, a economía e o medioambiente de Poio e a calidade de vida da veciñanza".
Finalmente Ana Pastor asegurou que "os deputados do PP non estamos en funcións e seguimos traballando polos asuntos que realmente importan aos veciños".
Pola súa banda, Moldes engadiu que a senda impulsada polo PP é "un auténtico balcón á ría".
Relacionadas:
-
Emenda do PP aos orzamentos do Estado para reactivar o proxecto de senda entre A Seca e Combarro
Por Redacción |
-
Masa Crítica, indignada ante a prohibición de circular en bicicleta pola Senda da Ostreira en Poio
Por Redacción |
-
O PP de Poio solicita a Costas un paseo desde Combarro ata A Seca
Por Redacción |
-
A senda litoral entre a praia de Campelo e A Seca vai tomando forma
Por Redacción |