Proxectan varias melloras no colexio Aurelio Marcelino Rey de Cuntis
Por Redacción
O colexio Aurelio Marcelino Rey será obxecto dunha serie de melloras. Así o acordaron o xefe territorial de Educación, César Pérez Ares, e o alcalde de Cuntis, Manuel Campos, nunha xuntanza á que tamén asistiu a directora do centro escolar.
De entrada, a Xunta cambiará os falsos teitos e o Concello pintará todo o edificio.
O goberno galego tamén analizará a posibilidade de que o colexio opte a formar parte do programa de reforma de centros para a eficiencia enerxética que permite, cada ano, mellorar varios centros educativos de forma integral.
Ademais, o Concello solicitou a Educación a desafectación das casas dos mestres situadas no entorno desde colexio co obxectivo de destinalas a temas sociais.
Con respecto a Cuntis, a Xunta achegará outros 10.168 euros para a mellora das instalación e para equipamento do centro sociocultural José Raído Patelas, dentro das axudas que acaba de resolver a Consellería de Cultura para a mellora das instalacións destinadas á programación de actividades culturais.