Moraña abre a tempada de baño
Por Redacción
O Concello de Moraña abriu este xoves a tempada de baño do verán coa apertura das piscinas municipais, que permanecerán en funcionamento ata o 15 de setembro.
O recinto acondicionouse nas últimas semanas e atópase en perfectas condicións para a campaña estival, segundo informou o Concello a través dun comunicado.
Durante os tres próximos meses, manterá o seu horario habitual de apertura de mañá e tarde en función do día. De luns a domingo abrirá de de 16.00 a 20.00 horas e de luns a venres tamén o fará pola mañá, de 10.00 a 14.00 horas, fundamentalmente para realización de cursos de natación.
O Concello vai manter as taxas de acceso do último verán, que están fixadas en 90 céntimos para os adultos e 45 para os menores. No caso dos cursos de natación, o custo tamén permanece estable en 21,04 euros mensuais.
A inscrición para os cursos está aberta nas propias instalacións e tamén pode obterse información na Casa da Cultura. Pola mañá haberá catro quendas de cursos a partir das 10.00 horas. Serán sesións de 45 minutos.
A alcaldesa de Moraña, Luisa Piñeiro, explicou que a piscina é un dos servizos municipais para o lecer máis empregados en Moraña e o Concello está moi satisfeito coas instalacións, polo que agardan que os morañeses e visitantes doutros municipios gocen delas durante todo o verán.