A aula Cemit de Cuntis propón un verán de aprendizaxe
Por Redacción
Unha ducia de cursos estarán ao dispor dos cuntienses na aula Cemit da vila este verán.
O maratón de actividades iniciarase o 2 de xullo cun curso de Impresión 3D con seis horas de duración. Termina o 4 de xullo e é para un máximo de dez persoas, con contidos centrados nunhas nocións básicas sobre este tipo de impresión, a procura de modelos 3D, a modificación destes modelos e a súa preparación para ser imprimidos, ademais do manexo do programa Tinkercard.
Dominar o smartphone será outro dos asuntos para tratar nun curso entre o 2 e o 4 de xullo. O obxectivo será resolver dúbidas, contestar preguntas, practicar e aprender a usar as principais aplicacións dos teléfonos intelixentes. Este curso repetirase do 1 ao 14 de agosto.
Mecanografía para maiores, entre o 15 e o 31 de xullo é outra das actividades que integran a oferta. Trátase dun curso de 11 horas de duración con dez prazas dispoñibles nas que os asistentes poderán coñecer o teclado e ir gañando velocidade e soltura a medida que practican a redacción de textos. Haberá unha segunda edición na primeira quincena de agosto.
A iniciación á informática ensinarase durante 8 horas entre o 15 e o 24 de xullo para o computador, os seus elementos básicos, controlar o teclado e o rato, navegar por Internet e usar os programas básicos. Na segunda quincena de agosto haberá unha nova edición.
Para os nenos está programado un ciclo de mecanografía entre o 15 e o 31 de xullo e o 1 e 14 de agosto para un máximo de dez asistentes que se repetirá do 19 ao 30 de agosto, e do 19 ao 30 de agosto espera un obradoiro de xogos educativos.
Por último está programada unha xornada destinada á resolución de dúbidas tecnolóxicas. Será o 30 de xullo entre as 12 e as 13 horas.
Os interesados deberán pasar polas dependencias do Concello para informarse e solicitar a súa matrícula, posto que as prazas son limitadas.