Avante Poio esboza as súas claves para conseguir un concello "aberto, cercano e resolutivo"
Por Redacción
Tres mulleres estarán á fronte de Avante Poio. Xunto a Silvia Díaz, actual concelleira non adscrita e candidata deste partido á Alcaldía, estarán Rebeca Quintillán e María Bóveda. Todas elas, máis os seus compañeiros, traballarán para conseguir que o Concello de Poio sexa "aberto, cercano e resolutivo".
Así o destacou Díaz na presentación dunha candidatura que foi elixida a través dunhas primarias abertas e que está formada case na súa totalidade por persoas novas que por primeira vez dan o paso de participar activamente na política municipal.
Avante Poio preséntase, segundo a súa candidata, para actuar como un "revulsivo contra a apatía e o estancamento" que aprecian no Concello tras 24 anos dun goberno no que ven "desgaste" e unha "falta de ilusión" para afrontar os retos do municipio.
De xeito concreto, o partido promete ser una "alternativa solvente e responsable" para os veciños de Poio, especialmente para o 40% deles que non votaron nas últimas eleccións, prometendo "transparencia" na toma de decisións e unha xestión municipal que utilice "con eficiencia" os seus recursos e os poña ao servizo da veciñanza.
Ademais de Silvia Díaz, Rebeca Quintillán e María Bóveda, o primeiro tramo da candidatura está formado por Juan Carlos Carballa e Jose Carlos Martínez.
Os seguintes postos da lista electoral de Avante Poio son Rosana Corredoira, Susana Portela, Pedro Santos Couce, Marcos Pazos Fontán, José María López Feijóo, Olga Blanco, Valentín Silva, Eva Lourenco, Alexandro López, Sandra Lage, Martín Moldes Santos e Beatriz Rodríguez.
Avanzan que entre outras medidas propoñen optimizar a xestión dos recursos, crear aulas de música, teatro ou formación, constituír o Instituto Municipal do Deporte, crear unha área de Mobilidade para fomentar o tránsito peonil e ciclista ou buscar prazas de aparcamento e activar un consello de participación veciñal.
Outra das primeiras propostas será actualizar os consellos municipais de cultura, muller e deporte e crear os consellos de medio ambiente, mocidade e promoción turística. Todos eles contarán con dotación orzamentaria, segundo Silvia Díaz, para que o seu funcionamento "teña un efecto transformador no día a día de Poio".