Marín reabre a súa praza de abastos tras cambiar o pavimento do chan
Por Redacción
Tras varios días pechada, a praza de abastos de Marín volverá abrir as súas portas este martes. Isto é posible despois de que se completaran os traballos para a renovación do pavimento do chan.
A obra tivo un investimento de 32.272 euros, que na súa maioría foron financiados con cargo ás subvencións para a rehabilitación e a sinalización do patrimonio histórico-cultural da Deputación de Pontevedra.
Os traballos consistiron na renovación do actual pavimento, que había que cambiar porque perdera as súas condicións para cumprir a normativa de hixiene aplicable a este tipo de espazos.
Así, instalouse un novo pavimento completamente impermeable, non absorbente e sen xuntas. En concreto, o chan ten un cor cuarzo nos corredores e, entre os postos, aplicouse resina de poliuretano.
Ademais, substituíronse as actuais tapas de fundición de ferro por tapas estancas de aceiro inoxidable.
A concelleira Cristina Acuña coordinou estas obras cos vendedores e as praceiras tratando de buscar o mellor encaixe para todos, consensuando estas datas para a súa realización.