A borrasca Laura deixa ventos de máis de 100 km/h e abundantes chuvias nas Rías Baixas
Por Alejandro Espiño
O último fenómeno meteorolóxico adverso, coñecido como a borrasca Laura, augou o Entroido en gran parte das Rías Baixas. Poucos foron os municipios que puideron sortear os efectos dun temporal que, no caso de Pontevedra, deixou fortes ventos e abundantes precipitacións.
Segundo os rexistros de Meteogalicia, as choivas deixaron case 57 litros de auga por metro cadrado na cidade de Pontevedra, só durante este martes 5 de marzo. O vento, con todo, non azoutou tanto como noutros puntos da provincia e os maiores refachos detectados foron de 51.4 quilómetros por hora.
Máis do dobre, por exemplo, rexistrouse en Bueu onde o aire chegou a alcanzar o 116 km/h na zona de Cabo Udra; ou en Cuntis, que superou mesmo eses rexistros e o vento chegou ata os 132 quilómetros por hora. Na Lanzada (O Grove) rexistráronse refachos de 101 km/h.
Pola súa banda, o temporal descargou cuantiosas choivas en toda a provincia e que, entre outros problemas, obrigaron a suspender as celebracións de entroido.
Así, Caldas de Reis, con máis de 65 litros por metro cadrado; Cerdedo-Cotobade, con 62 litros; Vilanova de Arousa, con 54 litros; ou O Grove, con 51 litros rexistrados superaron amplamente a media de precipitacións recollidas nas Rías Baixas durante as últimas horas.
A pesar deste mal tempo, non se rexistraron incidencias de consideración nas Rías Baixas, máis aló das habituais durante temporais similares como caída de árbores, desprendemento de lousas, balsas de auga en estradas ou pequenos danos no mobiliario urbano.