Os medios en galego animan á sociedade a "sacar peito" coa nosa lingua
Por Redacción
A música de Ugía Pedreira e o humor de Xosé Antonio Touriñán foron o fío condutor da segunda edición de Gala dos Medios en Galego, que se celebrou este sábado no Pazo da Cultura de Pontevedra.
Os medios en galego, reunidos en torno a unha asociación composta por máis de medio cento de socios, quixeron deixar claro que o idioma propio de Galicia é "tan válido como outro" para informar aos cidadáns.
Entenden que a situación actual "é preocupante pero non irreversible", polo que solicitaron un maior apoio por parte das administracións.
Así, reclamaron unha lei de publicidade institucional, ao entender que están en "clara desvantaxe" cos grandes grupos de comunicación de Galicia.
Entre os asistentes a esta gala estaban o responsable de Cultura na Deputación, Xosé Leal; o concelleiro de Normalización Lingüística de Pontevedra, Alberto Oubiña; ou o secretario xeral de Política Lingüística da Xunta de Galicia, Valentín García.
García, na súa intervención, quixo mostrar o seu apoio a estes medios dos que dixo que "non son os máis fortes" pero "cada vez son máis e se están consolidando", especialmente na rede.
Durante a gala, o debuxante Kiko Da Silva escenificou a "incerteza" na que se atopa a banda deseñada galega e reclamou apoio económico para este tipo de iniciativas, mentres que Luis Álvarez Pousa, de Tempos Novos, indicou que é necesaria máis profesionalización dos medios e avanzar na calidade da información e opinión.
Anxos Sobriño, en representación de Cotenol, os técnicos de Normalización Lingüística; Xaime Iglesias, da asociación Cedofeita, e Eva Mejuto, responsable do Salón do Libro Infantil e Xuvenil de Pontevedra, completaron o evento, xunto con Ubaldo Cerqueiro, vicepresidente da Asociación de Medios en Galego.