Silvia Díaz, á fronte dun novo partido en Poio: Avante Poio
Por Redacción
Un novo partido político vén de nacer en Poio. Trátase de Avante Poio, unha formación que parte das inquedanzas dun grupo de veciños liderados por Silvia Díaz, actual concelleira non adscrita na corporación municipal. O seu obxectivo, participar nas municipais de 2019.
O partido, que se presentará oficialmente en xaneiro, ofrece unha nova opción política que promete amosar unha forma "diferenciada e innovadora" de traballar para a cidadanía, a partir dun compromiso no que o programa electoral será o programa de goberno.
No seu comunicado de presentación, Avante Poio asegura que terá como eixo básico do seu traballo desenvolver políticas que garantan unha identificación plena da veciñanza coa cultura, elevar a calidade de vida e a convivencia baixo criterios de transparencia e igualdade e cunha xestión sustentable e respectuosa co medio ambiente.
Avanza que dirixirá a súa acción a todos os sectores da poboación e terá a formación, o emprego, a cultura, a sanidade e as infraestruturas como cuestións básicas do novo goberno de Poio, sendo o seu principal interese o benestar das persoas e a xestión "racional e sostible" do territorio e dos recursos municipais.
Ademais, de cara á "necesaria" rexeneración, Avante Poio propón limitar o tempo dun alcalde a dous mandatos, condición que esixirán ante calquera pacto de gobernabilidade; e impulsar a participación activa da cidadanía de Poio na toma de decisións e na xestión municipal.
A partir de xaneiro, engaden, darán a coñecer a súa formación no municipio de cara a incorporar a novas persoas a este proxecto, elaborarán o seu programa coas achegas dos cidadáns e avanzarán na súa folla de ruta.
Relacionadas:
-
Avante Poio esboza as súas claves para conseguir un concello "aberto, cercano e resolutivo"
Por Redacción |
-
Avante Poio intégrase na estrutura de En Marea para as municipais de maio
Por Redacción |
-
Silvia Díaz, concelleira de Cultura en Poio, marcha do BNG e abandona o goberno municipal
Por Alejandro Espiño |