Os cantares e danzas de Reis chegan ás rúas e prazas de Pontevedra con Trépia
Por Redacción
Os tradicionais cantares e danzas de Reis chegarán este sábado 22 de decembro ás prazas e rúas de Pontevedra da man dos integrantes da asociación cultural Trépia.
Esta actividade forma parte da programación da Festa da Xiada coa que Trépia celebra o seu décimo aniversario e desenvolverase na zona centro de Pontevedra.
Entre as 18.00 e as 20.00 horas haberá cantares e danzas nas prazas da Peregrina, San Xosé, Ferrería, Curros Enriquez e Ruínas de San Domingos. Ao seu remate, entre as 21.30 horas e a unha da madrugada será o turno da 'Foliada da Xiada' na praza da Pedreira.
Desde Trépia animan á cidadanía a participar nesta festa de aniversario na que haberá música e baile para dar a coñecer e celebrar o seu traballo de dez anos en prol da cultura galega.
Este ano a asociación conta con 100 alumnos e mantén en marcha un proxecto de recuperación, investigación e divulgación do patrimonio inmaterial que naceu, viviu e madurou en Pontevedra.