A Asociación Amencer e o investigador Pedro Mansilla, galardonados co premio Luís Tilve
Por Redacción
Este xoves 20 de decembro no salón de actos de UGT-Galicia, en Santiago de Compostela, terá lugar a celebración do acto de entrega dos XII Premios Luís Tilve, e que este ano recaeron na Asociación Amencer-ASPACE, na súa modalidade de Acción Solidaria e no investigador pontevedrés Pedro Mansilla pola Defensa do Medio Ambiente e dos Bens Comúns.
No caso de Amencer-ASPACE o premio recoñece o seu compromiso coas persoas con parálise cerebral e outros trastornos neuro-motores, dende hai 25 anos, a través de proxectos de atención especializada a domicilio, dun centro educativo e dun centro de día en Pontevedra, un centro de información, apoio e orientación en Vigo e un centro educativo e de día en Vilagarcía, proxectos de integración laboral, formación de voluntarios, e outras moitas actividades coas que se está dando resposta ás necesidades dos afectados para ser cidadáns de pleno dereito.
No caso de Pedro Mansilla Vázquez premia a súa traxectoria no campo da enxeñería agroforestal e, especialmente, polo seu traballo na conservación forestal de Galicia e na loita contra as pragas que ameazan os nosos montes, tanto dende o seu posto de enxeñeiro xefe da Estación Fitopatolóxica de Areeiro, como a través dos seus numerosos estudos e investigacións.
Tamén foi premiado na categoría Investigación e Divulgación Histórica, o historiador Jesús Manuel García Díaz, e na categoría Traballo Digno foi outorgado a Jesús Mosquera Sueiro.
O acto estará presidido polo presidente dehHonra da Fundación Luís Tilve e do xurado, Fernando González Laxe.
Os premios consistirán nunha escultura exclusiva do artista César Lombera, na que aparecen unhas mans entrelazadas, as cales representan simbolicamente todas as actitudes que se pretenden recoñecer e o propio espírito dos premios.