Seis persoas resultan intoxicadas por inhalación de fume nun incendio nocturno nun piso de Caldas
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Un total de seis persoas tiveron que recibir asistencia médica na noite deste sábado e un edificio da avenida de Pontevedra de Caldas de Reis tivo que ser desaloxado por mor dun incendio declarado nun piso da citada rúa.
Segundo a información facilitada polo Centro de Atención de Emerxencias de Galicia 112, os seis afectados recibiron os primeiros coidados no Punto de Atención Continuada do centro de saúde de Caldas e cinco deles tiveron que ser evacuados posteriormente ao Hospital Montecelo de Pontevedra por unha intoxicación por inhalación de fume.
As primeiras informacións apuntan a que o lume posiblemente se iniciou na campá extractora despois de que un dos ocupantes da vivenda estivera cociñando e deixara esquecida unha tarteira ao lume.
O primeiro aviso polo incendio realizouno un veciño ás 21.30 horas deste sábado. Indicaba que empezara a arder nun piso situado na avenida de Pontevedra, de maneira que desde o Centro Integrado de Atención ás Emerxencias de Galicia pediuse a colaboración dos Bombeiros do Salnés e dos membros do GES de Valga co fin de atallar o lume.
Ao lugar do incendio, tamén acudiron voluntarios de Protección Civil e axentes da Policía Local, que comezaron a desaloxar o edificio para garantir a seguridade das persoas mentres duraron as tarefas de extinción.
No que se refire aos danos ocasionados polo incendio, queimouse a campá extractora e viuse afectada unha parede da cociña.