Xusto despois de Reis, en xaneiro, comezarán a executarse os investimentos que, por valor de 58 millóns de euros, executará a empresa Viaqua nas redes de abastecemento de auga e saneamento. Son traballos comprometidos no novo contrato deste servizo, que a compañía se adxudicou polo próximos vinte anos.

A este diñeiro sumaranse outros sete millóns, procedentes do canon da auga, que se destinarán a obras que impulsará o propio Concello, e tres millóns adicionais que, en virtude deste novo contrato, serán para mellorar as redes xa existentes.

Para a programación destes traballos que, na súa maior parte, deben estar executados no próximos tres anos, responsables municipais reuníronse este mércores coa empresa Viaqua para determinar as actuacións prioritarias que se realizarán durante 2019.

Así, o alcalde explicou que, en materia de saneamento, empezarase pola parroquia de Verducido. O proxecto está a ultimarse e as obras comezarán en xaneiro. O seu tempo de execución dependerá da obtención dos terreos e da complexidade técnica e, tras realizalas, repoñeranse os viarios que teña que abrirse para instalar a rede.

Estas obras compaxinaranse, en meses posteriores, coas que se realizarán para completar a rede de saneamento en Santa María de Xeve, Santo André de Xeve, Campañó e Bora. Serán, en total, proxectos valorados nuns 20 millóns de euros que serán redactados entre finais de ano e principios de 2019.

Con respecto ao abastecemento de auga potable, a prioridade será dotar de servizo ao futuro Gran Montecelo e, a partir de aí, ampliar a rede ás parroquias de Mourente, Tomeza, Marcón, Salcedo e Bora.

Outra área de traballo serán as actuacións urbanas, onde de cara o próximo ano priorizarase a reforma das redes de saneamento e auga na rúa Echegaray que, posteriormente, será remodelada en superficie; ou a mellora do bombeo da nova estación potabilizadora de Monte Porreiro.

Miguel Anxo Fernández Lores, que estivo acompañado do concelleiro responsable do Ciclo da auga, Raimundo González, destacou que estas obras serán posibles grazas ao "esforzo solidario" de todos os cidadáns de Pontevedra, ao lembrar que se financiarán con cargo ao contrato de Viaqua que, maioritariamente, pagan os habitantes do núcleo urbano.

As obras en Verducido, segundo González, será o "pistoletazo de saída" duns traballos que, só no primeiro ano supoñerá poñer en marcha proxectos por valor de 35 millóns de euros.