A xerente do Sergas reafírmase no Parlamento no seu compromiso coa ampliación do Hospital do Salnés
Por Redacción
A xerente do Servizo Galego de Saúde, Nieves Domínguez González, reafirmou este xoves o compromiso da Xunta de Galicia de realizar a ampliación do Hospital do Salnés e indicou que a Administración está realizando "todos os pasos necesarios para cumprir con este compromiso".
Nieves Domínguez compareceu na Comisión Quinta de Sanidade, Política Social e Emprego do Parlamento de Galicia e indicou que xa se valoraron as necesidades asistenciais que están recollidas no plan funcional e redactouse unha proposta arquitectónica.
Ademais, solicitouse a cesión dos terreos necesarios á Mancomunidade do Salnés e realizouse a licitación da contratación da subministración enerxética prestacional e mantemento e conservación de edificios e instalación de centros sanitarios, con inclusión de servizos de redacción de proxecto, dirección facultativa de obras e coordinación de seguridade e saúde.
Dita licitación está en proceso e pendente de adxudicación. A empresa que resulte adxudicataria terá un prazo de seis meses para a redacción do proxecto de execución, que deberá ser revisado e aprobado para continuar coa licitación da obra de ampliación.
Segundo explicou Nieves Domínguez, como en todo proceso administrativo as empresas teñen a posibilidade de presentar os recursos que consideren e, neste caso, presentáronse cinco, entre os meses de setembro de 2012 a maio do presente ano. Neste intre, todos están resoltos menos o último, que está pendente do preceptivo trámite de alegacións por parte do resto dos interesados.