Falece un militar da Brilat durante un adestramento deportivo na base de Figueirido
Por Natalia Puga
Un militar da Brilat faleceu este luns ao termo do adestramento deportivo co que inician a xornada os soldados pontevedreses. Trátase do cabo primeiro Pablo Ucha Montero, de 40 anos de idade.
Fontes militares confirmaron que o cabo primeiro estaba casado e tiña un fillo, era veciño de Pontevedra e levaba 22 anos no Exército, todos eles na base General Morillo da Brilat. Na actualidade estaba destinado ao batallón do Cuartel General na sección de Policía Militar, se ben tivo outros destinos dende a súa entrada nas Forzas Armadas en 1991.
Os feitos sucederon sobre as 9.00 horas deste luns. Segundo fontes militares, o soldado estaba a realizar os exercicios de respiración posteriores ao adestramento deportivo xunto con outros compañeiros cando se sentiu indisposto e se desmaiou. Foi trasladado por outros militares á propia enfermaría da base, onde recibiu unha primeira asistencia dos servizos médicos da Brilat.
Mentres os médicos mílitares intentaban reanimalo, dende a base militar requiriuse a asistencia dunha ambulancia do 061, pero, segundo as fontes consultadas, cando chegou á base os efectivos militares, o home xa falecera e tan só puideron certificar o seu falecemento.
Os cargos da Brilat achegáronse á enfermaría, entre eles o xeneral xefe da Brigada, José Antonio Alonso, que ordenou que se comunicase o falecemento, en primeiro lugar, á esposa do cabo primeiro e supervisou todo o proceso ata a chegada do xuíz de garda. O xuíz decretou o levantamento do cadáver e posteriormente, foi trasladado en coche fúnebre ao Instituto de Medicina Legal de Galicia (Imelga), onde lle practicarán a autopsia para determinar as causas do falecemento.
Fontes da Base General Morillo indicaron que, de momento, non se decidiu realizar ningún acto institucional oficial en memoria do cabo primeiro Ucha. Será unha decisión que se consensúe coa propia familia e, en todo caso, posterior aos exequias fúnebres que se celebrarán este martes. Celebraríanse na propia base como se realizou con outros soldados falecidos.