A fábrica de Ence mellora os seus resultados ambientais
Por Oskar Viéitez
Durante os seis primeiros meses do ano, a fábrica de Ence en Pontevedra volveu mellorar os seus resultados ambientais respecto dos límites fixados na súa Autorización Ambiental Integrada (AAI), segundo informou a compañía pasteira nun comunicado.
Así, todos os parámetros que miden a calidade ambiental do efluente da planta melloraron, entre os que cabe destacar a Demanda Química de Osíxeno – DQO–, que mellorou nun 36% o límite establecido pola AAI da fábrica, indican estas mesmas fontes.
Segundo ENCE a evolución deste dato "consolida os avances que a fábrica de Lourizán veu realizando na calidade do seu efluente final". Ademais, resalta que a DQO de Ence-Pontevedra mellora nun 77% o límite máximo que marca a normativa europea BREF de mellores prácticas ambientais do sector da celulosa para este parámetro.
Engade este comunicado que os sólidos en suspensión, outro dos indicadores clave do comportamento ambiental da factoría de Ence en Lourizán, foron uns 59% inferiores ao máximo autorizado pola súa Autorización Ambiental Integrada. Así mesmo, a fábrica pontevedresa logrou situar o caudal do seu efluente un 28% por baixo do límite máximo marcado pola AAI da instalación.
A dirección da industria da celulosa remata dicindo que "os indicadores ambientais da biofábrica de Lourizán sitúan á factoría á vangarda do seu sector no mundo en desempeño ambiental. A biofábrica de Lourizán ten implantado os modelos de xestión ambiental máis avanzados: un Sistema Integrado de Xestión de acordo a normas ISO e certificado por AENOR. Ademais, o Centro está adherido ao Regulamento EMAS da Unión Europea, sendo a primeira fábrica de Galicia en acceder a este esixente compromiso voluntario".