Radio e música reivindicativas para conmemorar o Día da Pobreza
Por Redacción
A asociación Boa Vida Inclusión Social Activa conmemora este mércores 17 de outubro o Día Internacional pola Erradicación da Pobreza cunha charla-coloquio arredor da radio como instrumento para a loita contra as desigualdades e inxustizas sociais e unha actuación musical de tintes reivindicativos.
A charla, prevista para as 18.30 horas na Biblioteca Pública de Pontevedra contará coa participación, entre outros, do xornalista radiofónico e presidente da Asociación Galega de Reporteiros Solidarios (Agareso), Juan de Sola. Xirará ao redor do empoderamento das persoas como clave para erradicar a pobreza.
"A extrema pobreza perpetúa un círculo de discriminación que ameaza os dereitos das persoas", sosteñen dende a asociación Boa Vida, que quere facer fincapé nun dos dereitos fundamentais, como é o da participación e o empoderamento, tendo en conta tamén que este ano a ONU dedica esta data á promoción do empoderamento e a consolidación da paz.
A organización sostén que "a actual redución de apoio ás persoas desfavorecidas aumenta o tempo de permanencia na crise económica e condénanos a vivir e morrer na pobreza e fora dos sistemas de protección social acadados con tanto esforzo".
Dende Boa Vida consideran que o empoderamento ten un valor especial na voz, por iso un dos participantes na charla-coloquio será Juan de Sola, quen explicará como se lle da voz á pobreza dende a radio. Ademais, presentará a gravación dunha conversa entre os nosos socios coa que pretenden darlle voz ás persoas en situación de pobreza.
Rematarán o acto coa música de Gustavo Almeida, quen interpretará o seu tema De frente. Unha peza que pretende dar esperanza nestes momentos tan complexos e difíciles, nos que queremos lembrar que a crise non é froito do exceso de gasto público, senón da especulación e o malgasto do enramado bancario e financeiro. Ao final do acto haberá un ágape para os asistentes ao mesmo.