A Sección Cuarta da Audiencia Provincial de Pontevedra condenou ao empresario, Ángel Martínez "Lito", coñecido como o "rei das orquestras" en Galicia, a unha pena de 12 anos de prisión por seis delitos fiscais.

Segundo informan os xornalists Victor Méndez en páxinas do Diario de Pontevedra e Carlos García en Faro de Vigo, a sentenza inclúe multas multimillonarias para satisfacer as débedas contraídas con Facenda. Durante os exercicios 2011 e 2012 Lito declarou ingresos duns catro millóns cando en realidade facturou máis de 50.

Os datos expostos polo fiscal, Augusto Santaló, recollendo informacións de Facenda, demostran que Lito chegou a representar a través da súa empresa a máis de 70 orquestras, entre elas a Panorama, París de Noia ou Philadelphia, que realizaban 6.500 actuacións ao ano. A día de hoxe está declarado insolvente.

Durante o xuízo os peritos da Axencia Tributaria, relataron a súa actividade ilícita na que "Lito era o administrador e o que de feito tomaba as decisións". Así estaba rexistrado nunha serie de cadernos nas que se acharon os fluxos de entradas e saídas.