Pontevedra, a cidade "máis nova" de Galicia e con maior esperanza de vida
Por Alejandro Espiño
Pontevedra goza dunha boa saúde socioeconómica. É a principal conclusión do informe correspondente a 2016 do Observatorio Urbano da cidade que foi presentado este venres. En liñas xerais, este estudo asegura que a Boa Vila, con respecto ás outras seis grandes cidades galegas, mantén un posicionamento "importante".
O director do observatorio, Pedro Figueroa, explicou que este traballo, elaborado polo grupo de investigación G4 Plus do campus universitario de Pontevedra, demostra que a cidade está nunha posición media-alta en termos de cohesión social e nun lugar medio-baixo, aínda que cunha evolución positiva, no relativo a actividade económica e empresarial.
Máis de 1,2 millóns de datos forman parte deste informe socioeconómico que sitúa a Pontevedra como a cidade con menor idade media (cun 19% da poboación menor de 20 anos) e maior esperanza de vida de Galicia (case 84 anos). Tamén é líder no nivel de estudos dos seus cidadáns ou en rexistrar a menor taxa de mortalidade.
Non obstante, Figueroa tamén aludiu a outra serie de indicadores que "poden facer que perda a posición a longo prazo", como a taxa de natalidade, de 8,41 nenos por cada mil habitantes, a idade media das nais, das máis elevadas de Galicia (32,35 anos), ou o número de fillos esperados por muller, de 1,12.
No relativo á estrutura empresarial, os datos de 2015, os máis recentes dispoñibles, amosan "por primeira vez en moitos anos" un balance positivo no número de empresas de nova creación, 869, fronte ás dadas de baixa, 783, así como unha "evolución positiva" na creación de sociedades mercantís, nas que Pontevedra pasa do sétimo ao quinto lugar entre as cidades.
Ademais, figura en terceiro lugar no índice de actividade emprendedora elaborado para este proxecto e sitúase como a segunda cidade de Galicia, por detrás de Vigo, con menor débeda viva por habitante, 140 euros.
O responsable do informe salientou como "o aspecto máis negativo" as ratios de benestar e saúde, xa que Pontevedra é a cidade con menor porcentaxe de recursos humanos en atención primaria, con 2,31 profesionais por cada mil habitantes, e a que conta tamén coa menor porcentaxe de prazas con financiamento público en centros de servizos sociais.
Pola contra, amosa un dinamismo "importante" a nivel asociativo" e, en materia xudicial, é a urbe na que se rexistrou un maior descenso no número de infraccións penais, un 13,16% entre os exercicios 2015 e 2016.
Con datos sobre demografía, niveis de renda, educación, mercado laboral, estrutura empresarial, participación cidadá, construción ou turismo, este é un documento que se poderá consultar na web do Concello e que, segundo a concelleira de Promoción económica, Anabel Gulías, serve para "poder afinar na creación de políticas municipais".