Brutal malleira a un ancián de Meis, ao que asaltaron varios enmascarados na súa casa
Por Redacción
Disfrazados como o asasino da película Scream. Así asaltaron, segundo a Garda Civil, dúas persoas a un ancián de 87 anos na súa casa de Meis. Tiñan outros dous cómplices. Todos eles foron detidos. Non só polo roubo, senón por propinar unha brutal malleira á vítima durante o seu ataque.
Os detidos son tres homes, que ingresaron en prisión, e unha muller que quedou en liberdade con cargos. Teñen idades comprendidas entre os 20 e os 40 anos e son veciños das localidades de Caldas de Reis e Portas.
O asalto á vivenda do octoxenario produciuse o pasado 1 de novembro. Varios descoñecidos accederon á casa coa cara cuberta e agredírono para que lles indicase onde estaba o diñeiro en efectivo que gardaba.
A resistencia da vítima para revelarlles onde gardaba o diñeiro provocou unha brutal reacción dos asaltantes que o deixaron mal ferido encerrado na adega. A continuación, cortaron os cables do teléfono para impedir a comunicación e, a pesar de que inspeccionaron toda a casa, tan só lograron atopar unha carteira con 50 euros.
A consecuencia dos golpes recibidos, que lle ocasionaron a rotura de cinco costelas e múltiples contusións na cara e o corpo, o dono da vivenda estivo ingresado durante quince días nun centro médico.
A investigación da Garda Civil, coordinada polo equipo da Policía Xudicial de Cambados, concluíu que o roubo fora planificado por un veciño de Portas, relacionado coa contorna familiar da vítima, ao ter noticia de que na súa vivenda gardaba unha importante cantidade de diñeiro.
Esta persoa propúxolle a execución do roubo a dous mozos, de 21 e 22 anos, por aquel entón veciños de Caldas de Reis, que foron os supostos autores materiais.
Ao arresto destas tres persoas que foron detidas por un presunto delito de roubo con violencia, sumóuselle a detención dunha veciña de Portas pola súa estreita relación e colaboración no roubo.
Os axentes recuperaron a carteira, que apareceu enterrada nunha leira próxima á vivenda onde fora subtraída. A vestimenta e as caretas que utilizaron os dous asaltantes atopáronse escondidas nun escampado próximo ao domicilio que ambos compartían en Caldas de Reis.
Os detidos foron postos a disposición do xulgado de instrución número 3 de Cambados que decretou prisión provisional para os tres homes e liberdade con cargos para a moza.