A estrada Sacos-Trabazo, en óptimas condicións para afrontar o inverno
Por Redacción
A brigada municipal de obras segue a poñer a punto as estradas de Cerdedo-Cotobade para afrontar da mellor maneira posible o próximo inverno. A última zona en quedar arrombada foron as beiravías da estrada Sacos-Trabazo.
Esta é, sinalan desde o goberno municipal, a actuación máis ambiciosa deste ámbito ata a data co acondicionamento integral dos laterais da estrada entre Santa María de Sacos e o lugar de Trabazo, na parroquia de Carballedo.
En concreto, abordouse a limpeza dun longo treito de 3.425 metros que favorecerá a circulación entre estas dúas parroquias.
Os traballos encamiñáronse á erradicación completa de maleza nas dúas beiravías co dobre obxectivo de mellorar a seguridade viaria, xa que se incrementa a visibilidade dunha estrada bastante estreita e se favorece a escorrentía das augas de choiva nas vésperas da época invernal e de mellorar a imaxe desta contorna.
A brigada municipal de obras, tras dedicar a etapa final do verán e gran parte do outono a obras de saneamentos, canalizacións, urbanizacións, peches e outros servizos, está centrando agora a súa actividade na limpeza de certas beiravías do municipio que se consideran estratéxicas para garantir o correcto funcionamento das estradas no inverno.
Nas vindeiras semanas realizaranse accións similares noutros puntos do municipio.