A empresa catalá Bandalux traslada a súa sede de Granollers a Moraña
Por Oskar Viéitez
"Debido á situación política actual en Cataluña", a empresa Bandalux Industrial S.A. traslada a súa sede social de Granollers (Barcelona) ao municipio pontevedrés de Moraña, onde está situada a principal planta de produción da empresa fabricante de cortinas e sistemas de protección solar.
A dirección desta firma manifesta que este cambio pretende "garantir a seguridade xurídica" da empresa fundada no ano 1986 e aclara que a medida non afecta os postos de traballo actuais da sede e nin tampouco aos da planta de produción en Granollers, que seguirá coa súa actividade habitual.
Ademais da planta de fabricación de Moraña, cunha superficie de 16.000 metros cadrados, Bandalux produce no concello barcelonés de Granollers e en Gorizia (Italia) e Miami (Estados Unidos). A fábrica de Moraña, antes coñecida como Celtic Estores, conta cuns 200 empregados.
A súa presenza internacional foise ampliando ao longo destas tres décadas e a día de hoxe comercialízanse os seus produtos en países de todo o mundo
O cambio de sede social ten un efecto meramente administrativo e para a celebración de xuntas xerais.
Bandalux non é a única empresa que decidiu trasladar a súa sede a Galicia, nos últimos días a construtora Copasa, de capital galego, cambiaba a sede social de Pesa Medioambiente de Sant Cugat del Vallés a Santiago de Compostela.