Cerdedo-Cotobade reedita as xornadas turísticas, históricas e culturais Cuspedriños10
Por Redacción
O Concello de Cerdedo-Cotobade organiza a partir deste mércores 11 de outubro unha segunda edición das xornadas turísticas, históricas e culturais Cuspedriños10, que puxo en marcha no ano 2016 co obxectivo de complementar á Feira de Cuspedriños e honrar o pasado e a historia de Cotobade durante distintas épocas do ano.
Estas II xornadas turísticas, históricas e culturais Cuspedriños10 comezarán cunha actividade de recollida de castañas e magosto familiar a partir das 17.00 horas no antigo mercado de Cuspedriños. Os participantes deben inscribirse gratuitamente no concello ou no teléfono 986 760001 para facilitar as cuestións de loxística.
As actividades continuarán o sábado día 14 cun roteiro guiado de sendeirismo entre o antigo balneario de San Xusto e a Ponte Romana. Pasará polas principais iconas turísticas e históricas do municipio e, por cuestións de transporte, será preciso realizar unha inscrición previa no concello ou no teléfono 986 760001.
Ademais, haberá unha exposición itinerante sobre o 40 aniversario do Museo do Pobo Galego, que se contemplará no salón de actividades do consistorio de Carballedo durante unha semana en colaboración coa Fundación Antonio Fraguas.
A programación incluirá unha charla de Clodio González, biógrafo de Fraguas, o venres 10 de novembro e o 12 de novembro, tamén co apoio da Fundación Fraguas, haberá un roteiro do Foxo do Lobo pola contorna de Loureiro.
O presidente de Cerdedo-Cotobade, Jorge Cubela, insiste en que esta actividade "demostra o noso interese por consolidar aquelas iniciativas que teñen demanda", xa que o ano pasado acolleu a máis de 300 persoas, e por potenciar os valores ambientais e históricos en torno a un certame como a Feira de Cuspedriños.
Relacionadas:
-
As xornadas Cuspedriños10 acollen unha mostra do Museo do Pobo, a charla sobre Antón Fraguas e o Roteiro do Foxo do Lobo
Por Redacción |
-
Satisfacción polo "resultado exitoso" das xornadas Cuspedriños 10
Por Redacción |
-
Unha mañá de paseo ata o Foxo do Lobo
Por Redacción |
-
As xornadas "Cuspedriños10" incluirán charlas históricas e roteiros de sendeirismo
Por Redacción |