Cerdedo-Cotobade estrea a súa primeira xuntanza da terceira idade
Por Redacción
O Concello de Cerdedo-Cotobade vai realizar por vez primeira de forma conxunta o encontro anual das persoas maiores e programou para o vindeiro sábado 16 de setembro a primeira edición da Xuntanza da Terceira Idade.
A estrea deste acto de lecer terá lugar na carballeira de San Xusto, na parroquia cotobadesa de San Xurxo de Sacos, que foi escollida pola súa beleza e amplitude, pola súa centralidade xeográfica e pola súa boa conexión con gran parte do municipio grazas á estrada N-541.
As persoas interesadas en participar nesta xuntanza teñen que estar empadroados no concello e ter máis de 65 anos. Ademais, poderán asistir os cónxuxes destas persoas, os fillos que padezan algunha discapacidade e acudan acompañados dun adulto e as persoas non empadroadas pero que naceran no termo municipal. Neste último caso deberán abonar o importe íntegro do prato.
En canto ás inscricións, deberán realizarse ata o vindeiro 13 de setembro os martes e venres de 10.00 a 13.30 horas no Departamento de Servizos Sociais ou nas casas do pobo de Viascón e Tenorio. O custe pola asistencia e o xantar é de 10 euros.
A I Xuntanza da Terceira Idade de Cerdedo-Cotobade arrancará ás 13.00 horas cun oficio relixioso campestre para os asistentes e posteriormente haberá un multitudinario xantar de confraternidade seguido de actividades culturais e de lecer e animación musical.
O presidente municipal, Jorge Cubela, explicou que o goberno ten posta "moita ilusión" nesta actividade e ademais considera que a súa realización "é moi merecida e necesaria para honrar e outorgar unha gran xornada de lecer ás persoas maiores, que traballaron arreo polas súas familias e por este concello durante moitas décadas".
Ademais, quixo animar a todos os veciños a participar "para seguir fortalecendo os lazos de veciñanza do novo concello, que se estreitaron moito neste primeiro ano e que queremos que sigan por este camiño".