Eduardo Figueroa e Carlos Yebra son as Cebolas de Ouro 2017
Por Redacción
Este ano celébrase a XXXV Edición da Feira da Cebola e os dous galardoados coa Cebola de Ouro teñen un nexo común, que é a súa fidelidade e amor a Sanxenxo.
Eduardo Figueroa Martínez ten 88 anos e é un veciño de Sanxenxo xa xubilado, que ata o ano 1994 traballou no servizo de limpeza do Concello. El empezou a traballar no Concello na limpeza das praias. Ten tres fillas que viven en Sanxenxo e de feito a súa filla Josefa forma parte do persoal municipal no servizo de limpeza.
Pola súa banda, Carlos Yebra Branco, de 89 anos, naceu en Villadecanes, León, en 1928. É un xinecólogo xubilado que reside en Madrid e que, xunto coa súa familia, leva 61 anos ininterrompidos veraneando en Sanxenxo. Ten tres fillos que, coas súas respectivas familias, seguen sendo tan fieis a Sanxenxo como o seu pai.
A primeira vez que Carlos e a súa esposa, que faleceu hai oito anos, viñeron a Sanxenxo foi en xullo de 1956 de viaxe de noivos e hospedáronse no Hotel do Mar, no paseo de Silgar. Ao ano seguinte repetiron no mesmo hotel. Nos seguintes anos alugaron unha casa, primeiro na Fuensanta, logo na rúa Progreso ata que decidiron comprar un solar e edificar no mesmo, na Avenida de Madrid.