Recomendan aos ciclistas circular polo centro do carril en zonas onde hai turismos aparcados
Por Redacción
Ao redor das 14.15 horas un ciclista viuse implicado nun sinistro viario na rúa José Malvar cando, segundo a asociación Pedaladas, un condutor abría a porta dun coche estacionado para saír do seu interior sen decatarse da presenza da bicicleta e golpeándoa.
Segundo o colectivo ciclista, este tipo de accidentes son perigosos se a distancia de seguridade co vehículo que transita detrás non é a suficiente e remate por atropelalo.
Por este motivo, Quique Pérez de Pedaladas alerta os usuarios de bicicleta sobre a importancia de que circulen deixando unha marxe de seguridade cos vehículos aparcados, de forma que ocupen o centro do carril nos lugares onde existen zonas de estacionamento.
Ademais, recomenda aos automobilistas que comproben previamente que non circulan bicicletas ou calquera outro vehículo preto no momento de abrir a porta do turismo. En Holanda estableceuse a regra de utilizar o brazo oposto á porta que se quere abrir. En caso de abrir a porta esquerda realizaríase coa man dereita, o que permite un maior campo de visibilidade.
A asociación Pedaladas insiste en reclamarlle ao alcalde de Pontevedra que dote á cidade de "ciclovías" nas que se incorpore un sinal de alerta nos espazos compartidos entre bicicletas e coches para reducir este tipo de accidentes.