Medio cento de rapaces participarán nunha nova edición de Campalledo
Por Redacción
Un total de 52 nenos e nenas, distribuídos en dúas quendas, participarán na nova edición da iniciativa de lecer infantil estival Campalledo 2017, organizada pola Oficina Municipal de Información Xuvenil (OMIX).
Este campamento, un clásico do verán no municipio, celebrarase en réxime de pernoita, que terá lugar no CEIP de Carballedo, e con quendas de sete días e seis noites.
As persoas interesadas en inscribir aos seus cativos teñen de prazo ata o vindeiro venres 16 de xuño e deberán formalízalo a través do rexistro xeral. Posteriormente, a selección dos participantes, sempre que a demanda supere a oferta, decidirase por sorteo.
A primeira quenda, orientada aos cativos de 7 a 11 anos de idade, terá lugar entre os días 9 e 15 de xullo, mentres que a segunda, para os rapaces de 12 anos en adiante, será xusto a continuación entre o 16 e o 22 dese mesmo mes.
A oferta inclúe 16 prazas para os rapaces empadroados no concello en cada unha das quendas e outras 10 para os que non sexan do municipio, que están pensadas para cativos orixinarios da zona pero que residen noutras localidades e pasan as súas vacacións en Cerdedo-Cotobade.
As taxas quedan fixadas en 60 euros para os nenos do concello e 80 para os de fóra, aínda que en ambos casos se recollen descontos do 30% pola inscrición dalgún irmán e do 10% para os posuidores do carné xove. En caso de que as prazas dalgunha categoría non se cubrisen, trasladaranse á outra.
O presidente de Cerdedo-Cotobade, Jorge Cubela, quixo valorar moi positivamente esta actividade, "xa que está plenamente consolidada no verán do municipio, é moi demandada polos rapaces polo bo ambiente e a variedade das actividades e ademais favorece a conciliación persoal e laboral das familias".
Relacionadas:
-
Fin ao Campalledo, que en xullo xuntou en Carballedo nenos de toda a provincia para facilitar a conciliación
Por Redacción |
-
Cotobade amplía as prazas para as ludotecas de Carballedo e Tenorio
Por Redacción |
-
A Xunta organiza campos de traballo en Cerdedo-Cotobade e Vilanova de Arousa
Por Oskar Viéitez |