O novo PXOM de Bueu, pendente só da publicación nos boletíns oficiais
Por Redacción
O novo Plan Xeral de Ordenación Municipal (PXOM) de Bueu xa só está pendente da súa publicación no Diario Oficial de Galicia (DOG) e no Boletín Oficial da Provincia (BOP) e a continuación entrará en vigor.
O pleno do Concello aprobou este luns o documento completo, que inclúe as últimas revisións recomendadas dende a Dirección Xeral de Urbanismo, e que non supón cambios substanciais con respecto ao plan aprobado inicialmente.
O documento aprobouse cos votos favorables do BNG e ACB-SON, as abstencións do PP e o voto en contra do PSOE. O alcalde, Félix Juncal, destaca o fito histórico deste pleno e que o plan é un instrumento de futuro que "ten vocación de resolver problemas que vimos detectando dende os diversos gobernos". Destacou que é o mellor documento posible, tendo en conta toda a normativa e lexislación vixente.
O pleno tamén aprobou o expediente de estudo de detalle sobre sinalización de alineacións e ordenación de volumes na rúa Pescadoira, nos números 3,5 e 7 presentado por Dimarco Galicia S.L; e incorporouse como concelleiro do PP Ramón Cerviño Valero, tras a renuncia ao cargo da que fora voceira do grupo, Berta Pérez.