Os socialistas reclámanlle á Xunta a limpeza e saneamento do río Gallo, en Cuntis
Por Redacción
A deputada socialista María Pierres reclamoulle este martes á Xunta que se implique na limpeza e saneamento do Río Gallo, no Concello de Cuntis, para previr e evitar os danos polas enchentes e asolagamentos anuais. A responsable socialista presentou unha emenda a unha proposta debatida na Comisión de Obras Públicas do Parlamento de Galicia, que foi rexeitada polo Partido Popular.
Pierres reclamou a implicación da Consellería "mentres non se inclúa a Cuntis dentro do plan de xestión de risco de inundacións da demarcación Galicia – Costa (2015-2021)", e criticou a "tibia resposta" do goberno galego ás reiteradas peticións do Concello.
De feito, explicou que logo do último asolagamento, enviaron "unha cuadrilla que fixo labores de limpeza nun tramo do río, deixando a labor a medias".
A responsable socialista fixo esta proposta no debate dunha iniciativa que viña repetir a demanda dos socialistas galegos e do Concello na liña de incluír á vila no plan de xestión de risco de inundacións, e que responde a unha demanda reiterada polo Concello, as asociacións veciñais e as asociacións de comerciantes.
Reclamou a implicación do goberno galego nun traballo "que vén asumindo en solitario o Concello", que se encargou do mantemento e posta a punto da rede de saneamento, na Edar de Meira, na rede de saneamento do casco urbano e nas parroquias que tiveron problemas cos temporais, ademais das reparacións do paseo afectado polas crecidas nos últimos dous anos.