Cales son os efectos do cancro sobre o mundo laboral feminino?
Por Redacción
A asociación de mulleres Intercambio do Saber organiza este xoves día 2 de marzo unha charla coloquio baixo o título "O cancro non é de cor de rosa". O acto enmárcase dentro da celebración do Día Internacional da Muller e terá lugar no Museo Manuel Torres ás 20.00 horas.
Participarán mulleres que como Beatriz Figueroa, abogada e periodista, levan anos demandando que se cambie a lei para mellorar a protección laboral e a seguridade social das persoas enfermas de cancro, que como ela tiveron que recurrir aos tribunais para conseguir a incapacidade laboral.
Beatriz participará na charla coloquio xunto a Isabel Carragal, unha marinense traballadora do frío que "sofre a crueldade dun Estado que a obriga a traballar sufrindo cancro de mama con metástase".
Olaia Fernández Davila, ex deputada do BNG no Congreso foi a encargada de levar no seu día a proposición non de lei para mellorar a protección laboral e económica das persoas que padecen cancro que recollía a proposta de Beatriz Figueroa avalada con preto de 500.000 sinaturas, a pesar do cal tamén foi rexeitada pola maioría do goberno do PP.
Estas tres mulleres protagonizarán esta interesante charla coloquio, que irá precedida da curtametraxe "Ir a ningún sitio" dirixida polo pontevedrés Mario Iglesias inspirada no caso de Beatriz Figueroa.
Intercambio do Saber quere achegar así un tema tan de actualidade a toda a poboación de Marín, á cal convida a este acto de entrada libre.