Un Nadal cheo de actividades en Cuntis
Por Redacción
O Nadal volverá a ser unha época de festexos e actividades para todas as idades en Cuntis. Así o avanzou o goberno municipal, que ten deseñada unha ampla programación que comezará o venres 16 de decembro co acendido do alumeado e a tradicional chocolatada.
Unha vez máis, o alumeado de Nadal chegará a todas as parroquias do Concello, mantendo o gasto no mesmo en cifras moi próximas ás do ano pasado, algo máis de 7.000 euros.
O sábado 17 terá lugar unha das novidades do programa deste ano, a celebración do I Mercado Saudable de Nadal, na carpa instalada na Praza da Constitución. Durante toda a xornada haberá numerosos postos de produtos saudables, que estarán acompañados degustacións de produtos, un espectáculo de maxia e obradoiros e inchables para nenos.
Ademais, durante ese mesmo día terá lugar a celebración da comida das mulleres e homes de Cuntis, organizada polas veciñas e veciños do municipio e que conta coa colaboración do Concello de Cuntis.
Deste xeito, durante toda a xornada, o casco histórico da vila estará cortado ao tráfico rodado para poder desfrutar das numerosas actividades durante todo o día, que rematarán coa celebración do Festival Folclórico de Nadal, a cargo da Agrupación de Música e Baile Tradicional de Cuntis.
A visita dos paxes reais ao colexio Don Aurelio o luns 19, así como a recepción na Casa da Cultura por parte de Papá Noel e o Apalpador, continúan os actos para as crianzas, que se completan coa proxección da película O bosque animado (venres 30), coa visita a SilledaPark (xoves 29) e coa celebración do I Encontro Infantil Interparroquial (martes 3 de xaneiro).
Neste último, un servizo de autobús irá recollendo aos nenos polas distintas parroquias do concello para festexar un encontro de actividades, xogos e diversión na carpa da Praza da Constitución.
As mozas e mozos do concello poderán acudir ao Espazo CuntisXove durante o Nadal, que nas fines de semana festivas traslada a súa actividade aos venres. Ademais, organizase unha excursión a Cabeza de Manzaneda (mércores 28), para que as mozas e mozos entre 12 e 19 anos poidan desfrutar dunha xornada na neve.
Pola súa banda, o público adulto poderá gozar o venres 23 do XII Festival de Música Coral, que se celebrará na Igrexa Parroquial e que contará, ademais das catro corais do Concello, coa Banda de Música Infantil do Concello de Cuntis.
A programación de Nadal terá o seu peche de ouro o xoves 5 de xaneiro, coa tradicional Cabalgata de Reis, que percorrerá as principais rúas do Concello ata o Pavillón Municipal onde as nenas e nenos gozarán de actividades durante toda a xornada, ademais de poder pedirlle os seus agasallos aos Reis Magos.