Organizan un showcooking en Pontevedra para ensinar como aproveitar sobras de comida
Por Redacción
A praza de abastos de Pontevedra acollerá o mércores 23 de novembro, a partir das once de mañá, unha curiosa iniciativa. Trátase dun taller de cociña, coñecidos como showcooking, co que se busca ensinar aos consumidores a reducir os desperdicios alimentarios.
É unha iniciativa organizada pola Consellería de Medio Ambiente, que conta co apoio entre outros de Ecoembes e Sogama.
Este showcooking, que correrá a cargo de Héctor López do Restaurante España (Lugo), farase na praza porque é alí, segundo os organizadores, onde existe un punto de encontro de cidadáns de todas as idades e condicións.
Para fomentar este consumo responsable, este cociñeiro galego deleitará aos interesados coa elaboración dunha serie de receitas de cociña a partir de sobras de comidas, propiciando o máximo aproveitamento dos alimentos para evitar que estes acaben arroxados ao cubo do lixo.
Héctor López cociñará unha croqueta líquida de cocido para aproveitar as sobras dun cocido, polbo con emulsión de pataca e pimentón a partir das sobras dun prato de polbo á feira, ou boletus en texturas para aproveitar as setas que recollemos no campo, confitándoas en aceite e aproveitando este aceite para outros pratos, como un bo bacallau.
Ademais, tamén ofrecerá empanada aberta de sardiñas con aceite ao carbón, aproveitando as sardiñas dunha lata de conservas para facer unha empanada e o seu aceite para outro uso co que sorprenderá ao público e unha torta de mazá coas mazás que nos sobran na horta.
Así mesmo, proporcionará unha serie de instrucións básicas sobre a selección dos envases e outros residuos no fogar, identificando os contedores de destino en cada caso co obxectivo de garantir o seu posterior reciclado e, xa que logo, o aforro de enerxía e materias primas.
Trátase dun asunto importante porque, segundo datos da axencia da ONU para a Alimentación e a Agricultura (FAO), España é o sétimo país da Unión Europea que máis desperdicios de alimentos xera, con 7,7 millóns de toneladas ao ano, correspondendo tres delas ao consumidor final.
A actividade de showcooking complementarase cunha carpa informativa desde a cal dous educadores ambientais ao servizo da campaña explicarán aos asistentes as bondades da reciclaxe, como contribuír á mesma e cales serán os resultados da súa colaboración, resolvendo todas as dúbidas que poidan ser presentadas e tomando boa nota das observacións, comentarios e propostas trasladadas polo público.