Os feirantes de Ponte Caldelas deben renovar a súa licenza antes do 1 de decembro
Por Redacción
O goberno municipal de Ponte Caldelas fixo este domingo un chamamento aos feirantes da vila. Recórdalles que o próximo 1 de decembro remata o prazo para a renovación da súa licenza para seguir vendendo na feira municipal.
Os 112 vendedores ambulantes con licenza municipal na feira de Ponte Caldelas deben apurar os días que quedan para presentar a solicitude formal de renovación do seu permiso.
O prazo remata ese día, polo que os postos que queden vacantes poderán adxudicarse ás persoas que están en listaxe de espera.
Cada posto adxudícase individualmente a unha persoa física. Os titulares deben acompañar os documentos xustificativos de pago da taxa anual, alta como autónomos, na Seguridade Social, no Imposto de Actividades Económicas, seguro de responsabilidade civil e, se é o caso, carné de manipulador de alimentos.
A feira de Ponte Caldelas ampliouse este ano para chegar á zona máis próxima á pasarela sobre o río Verdugo. A actividade feiral espállase agora pola Alameda, que é o seu foco central, xunto coa avenida de Vigo, praza de España, praza do Bispo, rúa Marín e rúa do Emigrante.
Na aposta polo reforzamento da súa feira, o equipo de goberno tamén impulsou a peonalización parcial da avenida de Vigo durante as xornadas de feira para gañar en seguridade viaria e dar maior realce ao mercado e creouse unha gran bolsa de aparcamento na zona do Balneario.
Relacionadas:
-
Ponte Caldelas celebra na primeira fin de semana de febreiro a súa feira de oportunidades
Por Redacción |
-
Ponte Caldelas non quere que ningunha cooperativa controle a feira da vila
Por Oskar Viéitez |
-
Ponte Caldelas incrementa nun 110% o importe do convenio de apoio ao comercio local
Por Redacción |