Ponte Caldelas estrea unha pista multiusos para patinaxe e un minigolf
Por Redacción
A área deportiva que Ponte Caldelas ten en Chan da Barcia refórzase con dúas novas instalacións. Trátase dunha cancha multifunción, concibida para a práctica da patinaxe, e un minigolf de catro buratos. As obras, valoradas en 40.000 euros, foron acometidas grazas a unha subvención de 34.000 euros recibida dos fondos Feader da Unión Europa.
A pista de patinaxe, cunha dimensión de 20x10 metros, está completamente valada. O pavimento é de cemento pulido e conta tamén con canastras e porterías que permiten a práctica do baloncesto e do fútbol cinco.
Segundo o Concello, responde a unha insistente demanda existente entre colectivos sociais de Ponte Caldelas que reclamaban un espazo destas características, posto que hai rapaces que se estaban a desprazar a concellos veciños para patinar.
Os afeccionados á patinaxe disporán tamén dentro de pouco doutra infraestrutura de características moi diferentes como o carril-bici que se vai habilitar no paseo da Calzada. O carril, cunha lonxitude próxima a un quilómetro, estará tamén dispoñible para os patinadores.
En canto ao minigolf, optouse por deseñar e construír unha instalación de catro buratos e dotala de herba sintética para garantir un perfecto mantemento. Conta con paus e bolas, dispoñibles de xeito gratuíto no Pavillón Municipal, e está pensado para ser unha oferta de lecer para todas as idades.
Con esta mellora a área deportiva de Ponte Caldelas, situada en Chan da Barcia, pasa a dispor do campo de fútbol municipal, o pavillón polideportivo, unha pista de tenis, unha de pádel, unha cancha multideporte, cancha de patinaxe multiusos e minigolf, ademais dun parque biosaudable para maiores.