A Deputación aforra 400.000 euros en axudas por falta de xustificación ou rexeitamento dos beneficiarios
Por Redacción
A Xunta de Goberno da Deputación de Pontevedra vén de aprobar o inicio do procedemento de declaración de perda do dereito ó cobro de subvencións do antigo Plan de Acción Comunitaria (PAC) para o ano 2015.
En concreto, en decembro de 2014 se aprobaron achegas por valor de máis de 800.000 euros para este plan dos cales, tan só se destinou o 50% a asociacións e entidades que xustificaron as actuacións debidamente, o 50% restante non puido ser entregado posto que non se xustificaron as actuacións ou ben se rexeitaron as axudas polos propios interesados.
O 3 de xullo de 2015, menos de 15 días antes da toma de posesión do novo goberno da Deputación, o goberno de Rafael Louzán aprobaba a concesión ás asociacións e agrupacións das axudas económicas con destino ó financiamento de actuacións incluídas neste plan.
Un programa que para o novo goberno bipartito "se tiña convertido no símbolo do modelo clientelar e arbitrario do goberno de Louzán e que dedicaba os recursos públicos da institución provincial para subvencionar indirecta e irregularmente competencias propias doutras administracións e dos concellos, fundamentalmente do PP, a maioría sen licenzas e de xeito irregular como reparar tellados de igrexas, andas de imaxes relixiosas, ampliacións de camiños, parques infantís, construcións de aseos, melloras en centros sociais municipais, menaxe para cociñas, sinais de tráfico, zonas de esparexemento ou incluso procurar a mellora dos biótopos de coellos".
Segundo apunta o goberno provincial, o 20% do reparto do PAC facíao directamente Rafael Louzán por libre disposición "a agrupacións achegadas ó PP, moitas delas cun mínimo de tres veciños, sen CIF e sen estar constituídas como asociación, ou a militantes dese partido". O 80% restante cumpría unhas bases de pública concorrencia "que tiñan como protagonistas, na súa maior parte, ós conseguidores, concelleiros populares que actuaban como intermediarios".
O novo goberno da Deputación de Pontevedra salienta que rachou con este modelo clientelar, que tiña "un claro criterio político e ningún tipo de control". Os fondos do PAC foron trasladados, recordan, ao Plan Concellos.
Relacionadas:
-
O goberno provincial revela que Louzán repartía sen control fondos da Deputación a "conseguidores" do PP
Por Redacción |
-
O PP denuncia a perda de 110.000 euros en investimentos para a comarca por parte da Deputación
Por Redacción |
-
O PP denuncia que a Deputación deixa "desatendidos" a máis de 300 colectivos veciñais
Por Redacción |