Preparen chuvasqueiros, a borrasca visita as Rías Baixas esta fin de semana
Por Redacción
Durante este venres, Galicia mantense na influencia da borrasca situada no mar do Norte. Achegará aire frío nas capas medias e altas da atmosfera, de forma que a xornada quedará marcada pola inestabilidade atmosférica, segundo a información facilitada polo Servizo de Meteogalicia. Os ceos nas Rías Baixas manteranse parcialmente cubertos con chuvascos irregularmente repartidos. As temperaturas mínimas ascenderon lixeiramente mentres que as máximas sufrirán un lixeiro descenso situándose entre os 12 e os 15 graos. O vento soprará moderado de compoñente oeste.
A borrasca pasará moi preto de Galicia durante este sábado 19 deixando unha xornada de vento e choivas intensos, sobre todo, a partir do mediodía. Pola tarde, os ceos quedarán cubertos con choivas intensas na franxa atlántica. As temperaturas mínimas sufrirán un lixeiro descenso mentres que as máximas non rexistrarán cambios significativos, entre os 9 e os 17 graos. O vento soprará moderado do suroeste pola mañá, aumentando a forte pola tarde.
O domingo Galicia quedará nunha zona de transición á espera dunha nova borrasca, que se achegará polo noroeste nas últimas horas do día. Espéranse ceos parcialmente cubertos con chuvascos máis probables na zona oeste. Pola noite as choivas serán xeneralizadas e de intensidade localmente forte. As temperaturas mínimas experimentarán un moderado ascenso mentres que as máximas quedarán sen cambios significativos. O vento soprará moderada do suroeste, que aumentará a forte en todo o litoral e nas zonas altas.
A partir do luns 21, a inestabilidade procederá das borrascas situadas na zona norte con aire frío e vai manterse ao longo da semana. A probabilidade de precipitacións será alta con temperaturas baixas, entre os 7 e os 12 graos.