Bueu organiza unha nova edición do seu mercado ecolóxico o 20 de novembro
Por Redacción
Medio cento de postos formarán parte dunha nova edición do mercado ecolóxico e artesanal, Ecobueu, que terá lugar o vindeiro domingo 20 de novembro na carpa situada na Praza Massó entre as 11 e as 19.30 horas.
A filosofía que se atopa detrás destes mercados é a de poñer en valor o aproveitamento dos recursos naturais, ademais do fomento da praza pública como lugar de encontro.
Este será o segundo mercado destas características que se organiza este ano, tras o celebrado o 12 de xuño.
A participación queda limitada a cincuenta postos, os cales poden ser de alimentación, artesanía, comercio xusto, saúde e benestar, tecidos e calzado, e turismo. Ademais, reservaranse un máximo de dez postos para expositores de Bueu, unha forma de darlle preeminencia aos produtos de "marca Bueu".
As persoas que desexen inscribirse teñen un prazo de cinco días a contar desde este mércores, día no que foi publicado na sede electrónica e na web municipal, ademais de no taboleiro de anuncios. Unha comisión técnica valorará as propostas recibidas.